StelpaLitla

Tannlæknaritari Dauðans
Ef ég fer ekki að blogga bráðum verð ég sjálf orðin óaktívur bloggari, og það má víst ekki gerast! Er bara ekki búin að vera í miklu stuði síðustu daga....hvað þá bloggstuði! En hvað um það. Má ekki láta bugast ;)

Í síðustu viku afbókaði tanngómatangó-læknirinn minn tíma. Það náðist ekki í mig en var tilkynnt til pabba sem sagði auðvitað að hann gæti ekki ákveðið nýjan tíma fyrir mig, en aldrei var hringt. Í gær hringir svo Tannlæknaritari dauðans í mig og tilkynnir mér að ég eigi tíma á morgun (í dag) kl.12.30. Ég hika aðeins og segist nú ekki komast þá þar sem ég er í vinnu og ekki á bíl.
"Þú bara verður að koma. Það verður að klára þetta"
Ýrr litla er nú ekki alveg á því að láta spila svona með sig og sem aldrei fyrr fer ég nottla að æsa mig.
Ýrr: Heyrðu, þú getur ekkert sagt svona. Ég get ekki bara farið úr vinnu í tvo tíma til að taka strætó upp í kópavog til tannlæknis. Þú verður allavega að gefa mér séns á að athuga hvort ég fái far. Það er ekkert víst að ég geti reddað því!!(með svolítið frekjulegum tón viðurkenni ég)
Ritari dauðans: Þú verður bara að koma. Við búumst við þér nema þú hringir. Lagt á.

Hvað nú! Ég var nú frekar æst, en ákveð nú samt að athuga hvort sé hægt að redda þessu. Fæ frí í vinnunni í klukkutíma. Fæ bílinn hjá mömmu. Jæja. Þetta ætlar að hafast.

Nema hvað. Í dag skunda ég svo upp á tannlæknastofu og er að vonast til að ritari dauðans sé ekki á staðnum. Ég mæti á réttum tíma og tilkynni komu mína. En þegar ég er búin að bíða í korter og ekkert hefur gerst enn og ég búin að magna upp í mér pirring skunda ég aftur að ritaraborðinu, og viti menn. Ritari dauðans mætt á svæðið, með grímu og í bleikum ritarabúning, eins og úr lélegri bandarískri bíómynd.
Ýrr frekar pirruð: Heyrðu, fer ekki að koma að mér?
Ritari dauðans: Þetta verður bara augnablik, fáðu þér sæti, segir hún af gömlum vana.
Ýrr enn pirraðri: Ég er BÚIN að bíða í augnablik. Urrrr. Ég tók mér tíma úr vinnunni og hef ekki tíma til að bíða.
R D: Þú varst nú ekki sérlega kurteis við mig í símanum í gær
Ýrr pirruðust: !!!!!! EKKI ÞÚ HELDUR. Það er ekki hægt að ætlast til að maður geti alltaf hlaupið til
R D: SKO, það er nú lágmarks kurteisi að hringja þá og panta nýjan tíma
Ýrr REIÐ: KURTEISI??? Það er engin KURTEISI að panta nýjan tíma!!! Það er samt óþarfi að heimta að maður komi í....
Haldiði ekki að hún taki upp á því að svara í símann í miðju rifrildi!! Þótti mér þetta dónaskapur mikill svo ég reif bláa plastið af skónum, þrykki því í ruslið og STRUNSA út. Ritari dauðans hættir þá að tala í símann, hleypur á eftir mér út á gang og segir: Ég skal athuga hvort ekki sé hægt að koma þér að núna.
JÁ! URRR, segi ég og strunsa inn aftur og mér er vísað í stólinn.

Eftir þetta ákvað ég að róa mig niður og var hin kátasta þegar tannsi kemur, enda indælis maður. Allt lítur vel út í kjaftinum, tannbeinið búið að gróa vel og svona. Hann tekur myndir og líst svona agalega vel á. Skoðar viðbjóðslegar myndir úr aðgerðinni minni, blóð og tannhold útum allt.
Ég gæti nú bara sent þessar myndir inn og orðið "Séð og heyrt" stúlka mánaðarins, tísti ég og finnst ég alveg hrikalega fyndin. Tannsi virðist ekki á sömu skoðun því hann sýnir engin svipbrigði. Isss, ef Auður hefði verið þarna, hefði hún hlegið.

Að lokum fæ ég að fara, eftir klukkutíma hjá tannsa (með bið og böggi) og er bara korteri lengur en ég ætlaði....EN ég hefði verið lengur ef ég hefði ekki æst mig svo munið þið það krakkar mínir: Maður á alltaf að æsa sig ef maður getur.

Í verðlaun fékk ég líka kæruleysistöflu og lyfseðil upp á sýklayf (engan sleikjó, oohhh): Maður á alltaf að vera duglegur hjá tannsa.

StelpaLitla// Ýrr @ 20:15

föstudagur, júlí 4

þriðjudagur, júlí 1